Над 9.000 лица во Србија се заболени од инфекција слична на грип, која, според лекарите, е предизвикана од мутирани вируси кои ги погодуваат сите возрасти, но најмногу се ризични постарите лица и децата.
Педијатарот д-р Саша Милиќевиќ за Nova.rs изјави дека здравствените установи се преполни со пациенти со симптоми слични на грип, но лабораториските анализи покажуваат дека не станува збор за класичен грип. „Овие вируси имаат изменета структура, поради што имунолошкиот систем тешко ги препознава. Болеста често се јавува и кај лица кои неодамна прележале друга инфекција“, објасни тој.
Најчести симптоми се висока температура, понекогаш над 40 степени, болки во мускулите и зглобовите, силна малаксаност, губење на апетит, поспаност, а кај дел од пациентите се јавува и дијареја, што го зголемува ризикот од дехидратација. Децата побрзо закрепнуваат, додека кај возрасните болеста трае подолго и е потешка.
Лекарите предупредуваат дека антибиотиците не помагаат, бидејќи станува збор за вирусна инфекција, и препорачуваат одмор, изолација, внесување доволно течности и симптоматска терапија. Вирусот се пренесува преку кивање, кашлање, близок контакт и контаминирани предмети, па се советува лицата со симптоми да останат дома најмалку неколку дена за да се спречи понатамошно ширење.
