Неколку лица се повредени во напад со нож што се случи во студентски дом на Медицинскиот универзитет во Уфа, Русија, јавуваат локални медиуми. Според првичните информации, најмалку две лица се здобиле со тешки повреди, додека уште неколкумина се хоспитализирани со умерено сериозна здравствена состојба.
Меѓу повредените има и дете, кое е пренесено на лекување во градска болница. Нападот го потврди и официјалната претставничка на руското Министерство за внатрешни работи, Ирина Волкова, која соопшти дека напаѓачот ранил повеќе лица, меѓу кои и еден полицаец.
Осомничениот, роден 2002 година, е приведен од страна на полицијата. Подоцна беше соопштено дека вкупниот број на повредени се зголемил, а настраданите биле евакуирани од објектот со помош на студентите кои се наоѓале во домот.
Според сведоштва на очевидци, во инцидентот можеби учествувале две лица. Едниот напаѓач бил брзо совладан, додека за другиот се тврди дека кратко време држел заложници во една од просториите. Надлежните органи продолжуваат со истрагата за целосно расветлување на случајот.
