Дојранското Езеро бележи бавно, но сигурно зголемување на водостојот, благодарение на есенските и зимските врнежи, покажуваат најновите податоци на Управата за хидрометеоролошки работи (УХМР). Сепак, водата сè уште не го достигнала договореното минимално ниво со Грција – 146,13 метри надморска височина.
Според УХМР, од крајот на октомври до средината на февруари, езерото се зголемило за околу 50 сантиметри. Последното мерење покажало дека водостојот е на 145,42 метри, што значи дека недостасуваат уште околу 71 сантиметар за да се достигне минималната кота.
„Полнењето на Дојранското Езеро е најинтензивно со водите од топењето на снегот на Беласица, но засега снежна покривка нема. И покрај последните врнежи, природниот процес на стареење на езерото го намалува неговиот волуменски капацитет,“ објаснува Васко Стојов, раководител на Секторот за хидрологија во УХМР.
Прогнозите се умерено оптимистички – се очекува водата да продолжи да расте во наредните месеци. Меѓутоа, со покачувањето на температурите и влијанието на ветерот, дел од водата неизбежно ќе испари.
„Можно е до почетокот на летото да се надоместат овие 70 сантиметри, но истовремено ќе имаме затоплување и зголемено испарување. Дури и со дождливиот период, долгите сушни години го чувствуваме во нивото на езерото,“ додава Стојов.
Споредувајќи со февруари 2017 година, водостојот бил 147,10 метри, односно речиси еден и половина метар повисок од сегашниот. Оваа разлика јасно покажува колку влијаат сушата и климатските услови на природната состојба на Дојранското Езеро.
