Во Хаг се отвори финалната фаза на судскиот процес против поранешните лидери на Ослободителната војска на Косово (ОВК), меѓу кои поранешниот претседател Хашим Тачи и поранешните претседатели на косовското Собрание Кадри Весели и Јакуп Красниќи, како и поранешниот пратеник Реџеп Селими. Станува збор за еден од најзначајните случаи на Специјализираниот суд, кој ја има мисијата да суди за сериозни злосторства извршени за време на и по конфликтот во Косово.
Обвинителката Кимберли Вест во воведното обраќање ја истакна улогата на судот како функционален и ефикасен механизам за правда, кој успеал да обезбеди соработка на сведоци и покрај заканите, стравот и стигматизацијата со кои тие и нивните семејства се соочувале. „Вистината мора да излезе на виделина“, рече таа, подвлекувајќи ја важноста на сведочењето.
Обвинението наведува дека приближно 100 лица биле убиени, а стотици други незаконски лишени од слобода и злоупотребувани во повеќе од 50 логори под контрола на ОВК. Според обвинителите, мотивот зад овие дејствија бил воспоставување целосна контрола над Косово и елиминација на сите кои биле перципирани како противници, соработници на српските сили или личности кои не ја поддржувале агендата на ОВК.
Меѓу жртвите, според обвинението, биле припадници на Демократската лига на Косово, како и членови на ромската и српската заедница. Обвинителството тврди дека насилството било систематско и организирано, со цел зацврстување на моќта и авторитетот на обвинетите.
Во завршнуот дел, обвинителката побара осуда за сите обвинени и единечна казна од 45 години затвор за четворицата, земајќи го предвид нивниот индивидуален придонес во злосторствата. „Станува збор за воени злосторства и злосторства против човештвото, чија сериозност не се намалува со минувањето на времето“, нагласи Вест.
На самиот почеток на процесот, сите четворица обвинети се изјаснија дека се невини. Според обвинението, злосторствата се случиле од март 1998 до септември 1999 година, на повеќе локации во Косово и северна Албанија.
Откако ќе завршат завршните зборови, судечкиот совет ќе има три месеци да донесе конечна пресуда или, доколку е потребно, да побара продолжување на рокот за одлучување.
