Меѓународниот фестивал на филмската камера „Браќа Манаки“, најстариот и прв фестивал во светот целосно посветен на уметноста на кинематографијата, го најавува своето 47. издание, кое ќе се одржи од 19 до 25 септември 2026 година.
Седум дена градот под Пелистер ќе пулсира во знакот на седмата уметност, носејќи средби со врвни светски кинематографери, разговори за филмската слика, инспиративни проекции и незаборавна фестивалска атмосфера што со децении го вградува Битола на мапата на најзначајните филмски центри во светот.
Основан во 1979 година, фестивалот го носи името на браќата Јанаки и Милтон Манаки – визионери и пионери на филмската камера на Балканот, чие творештво остави неизбришлива трага во историјата на светската кинематографија. Нивното наследство и денес е суштината на фестивалот: славење на филмската фотографија како врвна уметност.
Годинешната програма ветува богат и внимателно куриран избор на играни, документарни, кратки и студентски филмови, распоредени во пет натпреварувачки програми што ги отвораат најактуелните авторски, естетски и визуелни прашања на современиот филм. Публиката може да очекува дела што возбудуваат, предизвикуваат и оставаат силен визуелен печат.
Посебно место, како и секоја година, зазема Клубот на великаните – симбол на континуитетот и реномето на фестивалот. Низ изминатите децении, „Браќа Манаки“ ги чествуваше најзначајните имиња во светската кинематографија, автори чии камери ја менувале историјата на филмот.
И оваа година ќе бидат доделени престижните награди „Камера 300“ – Златна, Сребрена, Бронзена, Железна, Мала и Кристална – признанија што се сметаат за едни од највисоките одликувања во областа на филмската фотографија. Дополнително, фестивалот ќе ги врачи и почесните награди: Златна камера 300 за животно дело во кинематографијата, Специјална Златна камера 300 за извонреден придонес во светската кинематографија, Златна камера 300 за креативна синергија, како и наградата „Голема ѕвезда на македонскиот филм“ во доделување на ДФРМ.
