Ако размислувате за издавање кредитна картичка во Македонија, подгответе се и за годишен трошок кој често се заборавa – членарината. Таа најчесто се движи околу 1.500 денари, но разликите меѓу банките се очигледни кога ќе се погледнат официјалните тарифи објавени на платформата на Народната банка.
На пример, Шпаркасе банка и ПроКредит банка наплаќаат по 1.500 денари годишно, додека Халк банка и Централна кооперативна банка чини 1.200 денари. УНИ банка е најскапа со 1.800 денари, а кај Стопанска банка и НЛБ членарината е нешто пониска – 895 односно 900 денари, при што пензионерите имаат поволности. Слични суми се забележуваат и кај Комерцијална банка (900 до 960 денари) и кај Силк роуд банка (900 денари за „Виза“ картичка).
Важно е да се знае дека не сите банки наплатуваат членарина на ист начин. Некои го прават тоа еднаш годишно, други на месечни рати. Некои банки нудат ослободување од членарина првата година, а кај дел од банките таа може да се избегне и во наредните години доколку месечниот промет надминува одредена сума. Сепак, дури и ако картичката не се користи, додека е активна, банката бара наплата.
Освен членарината, користењето на кредитната картичка носи и други трошоци. На пример, повлекувањето готовина од банкомат секогаш е со провизија, која кај македонските банки се движи од 2 до 4 отсто, во зависност од институцијата.
За да се олесни споредбата на трошоците, Народната банка редовно објавува споредбени податоци за надоместоците на најчесто користените платежни услуги. Банките се обврзани да ги почитуваат законските ограничувања и да ги информираат клиентите за сите трошоци пред склучување на рамковниот договор, преку Информативен документ за надоместоците (ИДН).
