Меѓу станбените згради и во непосредна близина на булеварот „Видое Смилевски-Бато“ во Ново Лисиче, комуналните екипи на Општина Аеродром започнаа обемна акција за хортикултурно уредување. По подолг период, оваа фреквентна локација добива нов живот преку засадување декоративни растенија, цвеќиња и тревни површини, со што се создава просторно решение кое нуди пријатна и уредна атмосфера за жителите и минувачите.
„Целта е создавање чисти и уредни јавни простори кои ќе ја подобрат секојдневната околина“, истакнаа од Општината. Новите зелени површини и цветните аранжмани значително го разубавуваат просторот, овозможувајќи пријатно движење и свежа визија на урбаното јадро на населбата.
Покрај новото зеленило, во изминатиот период целосно беше заменет и плочникот, обезбедувајќи безбеден и функционален простор за пешаците.
„Продолжуваме да вложуваме во зелени и уредени јавни простори, затоа што чистата и здрава околина значи подобро секојдневие за сите наши граѓани“, посочија од Општината, нагласувајќи ја посветеноста кон унапредување на квалитетот на животот во Аеродром.
