Синоќа околу 22:05 часот, територијата на Македонија беше потресена од земјотрес со епицентар во соседното Косово, околу 45 километри северозападно од Скопје. Според податоците од Сеизмолошката опсерваторија при Природно-математичкиот факултет во Скопје, земјотресот имал локална Рихтерова магнитуда од 4.6.
Најсилно потресот бил почувствуван во Тетово, Гостивар и околните места, каде достигнал интензитет од V степени според Европската макросеизмичка скала. Во Скопје и во неговата околина земјотресот се почувствувал со интензитет од IV до V степени, додека во останатите делови на државата интензитетот бил помеѓу III и IV степени.
Сеизмолозите истакнуваат дека земјотресот бил доволно силен за да биде забележан од голем број жители, но за среќа, досега нема пријави за поголема материјална штета или повредени лица.
