Претседателот на САД, Доналд Трамп, изјави дека Иран има силна желба да постигне договор со Вашингтон, но дека тоа не го признава јавно поради страв од внатрешни и надворешни последици.
– Преговараат и многу сакаат да постигнат договор, но се плашат да го кажат тоа бидејќи мислат дека нивните луѓе ќе ги убијат. Се плашат и дека ние ќе ги убиеме – изјави Трамп.
Тој додаде дека никогаш не видел лидер на некоја држава кој толку малку сака да ја извршува својата функција, алудирајќи на раководството во Техеран.
– Никогаш не постоел лидер кој помалку го сакал тој пост од оној што го води Иран. Слушаме што зборуваат. Велат: „Би сакале вие да бидете следниот врховен лидер.“ Не, благодарам, не го сакам тоа – рече Трамп.
Изјавите на американскиот претседател доаѓаат во време на тековен конфликт и зголемени шпекулации за можен договор меѓу Вашингтон и Техеран. Додека од САД се тврди дека има напредок во разговорите, иранската страна во изминатите денови јавно ги отфрла тврдењата дека воопшто се водат преговори.
Трамп и претходно привлекуваше внимание со слични изјави во свој стил. Минатата година, одговарајќи на прашање за тоа кој треба да биде нов папа по смртта на Папа Франциск, тој на шега изјави дека би сакал токму тој да биде избран.
Дополнително, тогаш беше објавена и фотографија генерирана со вештачка интелигенција на која Трамп е прикажан како папа, што предизвика реакции кај дел од јавноста.
…
