Се уредува просторот зад зградата на СВР Битола, односно парцелата која досега претставуваше неорганизирана земјена површина.
Со проектот е предвидено партерно уредување со бехатон плочки на површина од околу 800 квадратни метри. Во рамки на зафатот се решава и одведувањето на атмосферските води, преку поставување собирни одводни решетки кои ќе овозможат ефикасно одведување на водата од уредената површина.
Вкупната вредност на проектот изнесува околу 2,3 милиони денари, а изведувач на работите е јавното претпријатие „Нискоградба“.
Од Општина Битола информираат дека активностите за уредување на јавниот простор ќе продолжат и на други локации каде претходно беа отстранети гаражи. Планирано е да се изградат нови паркинг простори кај „Овчи Пазар“, „Ат Пазар“, на локацијата позната како „Хеликоптерот“, кај „Кифлата“, како и на просторот кај поранешниот финансов објект во близина на „Дрвен Пазар“.
…
