Вистински хорор и драматични моменти доживеала мајка со своите две малолетни деца во кичевското село Другово, откако биле нападнати од две кучиња од расата ротвајлер за време на обична прошетка.
За целиот случај сведочи самата мајка преку емотивна објава на социјалните мрежи, каде ги опишува моментите на страв и паника, барајќи итна реакција од институциите и одговорност од сопственикот на кучињата.
Според нејзиното сведоштво, нападот се случил ненадејно кога двете кучиња почнале агресивно да лаат и да се движат кон нив. Во обид да ги заштити своите деца, таа го кренала помалото дете во раце, додека со другата рака се обидувала да го задржи поголемото девојче.
Но ситуацијата за неколку секунди прераснала во вистински кошмар.
„Во тој момент едното куче ми го повлече малото дете од раце и тоа падна на бекатонот. Додека се обидував да го спасам, се појави и другото куче, кое агресивно ме нападна, ме фати за дуксерот и повторно ми го повлече детето“, сведочи мајката.
Драмата дополнително се влошила кога во непосредна близина поминувал автомобил кој нагло закочил. Според нејзиниот опис, детето кое било влечено од кучињата по подлогата завршило непосредно пред предното тркало на возилото.
Со последни сили успеала повторно да го извлече детето и да побегне кон дворот на соседите, каде се засолниле. Но, како што тврди, кучињата продолжиле да ги следат и по нападот.
Во инцидентот едно од децата се здобило со телесни повреди, кои биле констатирани и медицински третирани во Медицинскиот центар во Кичево.
Дополнителен револт кај мајката предизвикала реакцијата на сопственикот на кучињата, кој според нејзините тврдења не покажал загриженост за состојбата на децата.
„Сопственикот ладнокрвно прокоментирал дека на детето не му е ништо“, наведува таа.
Случајот веднаш бил пријавен во Министерството за внатрешни работи од страна на Службата за итна медицинска помош, а мајката веќе дала официјална изјава во полициска станица.
„Ова не го споделувам за да правам драма, туку затоа што денес беше моето дете – утре може да биде нечие друго. Барам одговорност и реакција од надлежните институции. Никој не смее да поминува низ ваков страв и траума“, апелира мајката.
Се очекува надлежните институции да постапат по пријавата и да ги утврдат сите околности околу случајот.
