Турскиот претседател Реџеп Таип Ердоган и грчкиот премиер Кирјакос Мицотакис потпишаа заедничка декларација со која двете земји ја истакнаа својата решеност за продлабочување на билатералните односи, мирен соживот и меѓусебна почит. Во декларацијата, објавена по вчерашниот шести Висок совет за соработка, лидерите нагласија дека целта е јасно дефинирање на каналите за дијалог и елиминирање на извори на тензии кои би можеле да ја загрозат стабилноста на односите.
Покрај декларацијата, во Анкара беа потпишани и шест договори за различни области на соработка, со фокус на економијата, туризмот, безбедноста и инфраструктурата. Двете земји се договорија да ги зајакнат трговските врски со цел обемот на билатерална трговија да достигне 10 милијарди долари до крајот на деценијата. Особено беше поздравена продолжената програма за краткорочни визи за турски туристи на 12 грчки острови во Егејското Море.
Безбедноста и регионалната стабилност исто така беа во фокусот на декларацијата. Турција и Грција се согласиле да продолжат со соработката во борбата против нелегалната миграција, тероризмот и организираниот криминал. Дополнително, беа отворени нови можности за соработка во енергетиката, модернизацијата на прекуграничните патни и железнички коридори, одржливото управување со водите на реката Марица/Еврос, како и во развојот на новите технологии.
Лидерите истакнаа и значењето на нивното заедничко дејствување во рамки на НАТО, во пресрет на Самитот во Анкара закажан за 7-8 јули 2026 година, како и проширување на соработката во меѓународните организации. Ердоган и Мицотакис споделија и разменија мислења за односите Турција – ЕУ и нагласија дека позитивниот моментум во политичкиот дијалог ќе се одржува и понатаму, вклучувајќи ја Позитивната агенда и разговорите за мерки за градење доверба.
Во врска со историските тензии, Ердоган рече дека иако прашањата поврзани со Егејското Море и Источниот Медитеран се трнливи, тие не се нерешливи доколку постои добра волја, конструктивен дијалог и намера за решение. „Со задоволство констатирав дека се согласуваме со мојот драг пријател Киријакос и веруваме дека од 2023 година наваму ќе се постигне напредок во решавањето на овие прашања“, рече Ердоган.
Грчкиот премиер Мицотакис додаде дека единствената преостаната разлика меѓу двете земји се прашањата за морските зони, континенталниот гребен и Ексклузивната економска зона (ЕЕЗ), кои можат да се решат пред меѓународен судски орган. „Искрено посакувам да се реализира разврска во таа насока. Ако не сега, кога?“, порача Мицотакис, нагласувајќи ја потребата од отстранување на секоја формална и суштинска закана во билатералните односи.
