Во подрачното училиште „Стрмец“ во хрватскиот град Света Недела започна реализацијата на изборната настава по Македонски јазик и култура, со што уште една средина во Хрватска се приклучи кон мрежата училишта што нудат изучување на мајчиниот јазик на македонската заедница.
Зад иницијативата стои професорката Ивана Брезовец, која веќе подолг период го предава предметот во Првата гимназија во Загреб и активно делува во македонското културно друштво „Охридски бисер“. Идејата за воведување на наставата во Света Недела произлегла од интересот на ученици и родители, а поддршка била обезбедена од институциите задолжени за образованието и правата на националните малцинства во Република Хрватска.
На одбележувањето на почетокот на наставата присуствувале претставници на дипломатскиот кор и културните институции, како и локалната самоуправа. Амбасадорот на Македонија во Хрватска, Драган Ѓурчевски, заедно со претставници од Министерството за наука, образование и млади на Хрватска, разговарале со училишното раководство за унапредување на соработката и за натамошна поддршка на програмата.
Градските власти на Света Недела ја поздравиле иницијативата, истакнувајќи дека образованието на јазиците на националните малцинства придонесува за меѓусебно разбирање и културна размена во локалната заедница.
Наставата по Македонски јазик и култура во Хрватска моментално ја следат повеќе од сто ученици во неколку основни училишта и гимназии во повеќе градови, меѓу кои се Загреб, Риека, Осиек, Пула и Сплит. Предметот е изборен и оценките се внесуваат во ученичките свидетелства, а покрај припадниците на македонското малцинство, интерес покажуваат и ученици од други заедници.
