Американскиот претседател Доналд Трамп јасно стави до знаење дека Иран ќе трпи сериозни последици доколку не се постигне договор со Соединетите Американски Држави. „Ќе биде многу трауматично за Иран ако не се договориме“, изјави Трамп во Белата куќа, нагласувајќи дека Техеран требало да се согласи уште минатата година во текот на преговорите околу спорната нуклеарна програма.
Средбата со израелскиот премиер Бенјамин Нетанјаху ја оцени како „многу добра“ и повтори дека САД преферираат договор пред воена акција. Израел долго време изразува загриженост дека евентуален договор ограничен само на нуклеарните активности на Иран е недоволен, барајќи од Техеран да го намали арсеналот на балистички ракети и влијанието врз регионалните сојузнички групи.
Во меѓувреме, дел од функционерите во администрацијата се залагаат за пошироки преговорски цели, но Трамп засега ги задржа американските барања релативно нејасни, додека Иран инсистира дека е подготвен да разговара само за нуклеарното прашање.
Напнатоста дополнително се зголеми откако Иран насилно го потисна масовното граѓанско движење, при што беа убиени илјадници демонстранти. Во одговор, Трамп ја зголеми американската воена присутност во регионот, вклучително и со носачот на авиони USS Abraham Lincoln, упатувајќи јасна порака до Техеран дека Соединетите Држави се подготвени на секој исход.
