Вицепремиерот и министер за транспорт и врски Александар Николоски денеска од Неготино и Демир Капија, по повод празникот Св. Трифун, им посака успешна сезона и добар род на лозарите.
Тој истакна дека земјоделците ја започнуваат новата сезона со исплатени субвенции, нагласувајќи дека Владата ја исполнила својата обврска кон сите производители.
„Лозарите со исплатени субвенции ја започнуваат сезоната. Владата ја заврши својата обврска кон земјоделците и субвенциите се целосно исплатени за сите кои макотрпно работат и произведуваат“, изјави Николоски.
Вицепремиерот потенцираше дека поддршката за земјоделството ќе продолжи и во наредниот период, со цел да се стимулира домашното производство и да се подобрат условите за работа на земјоделците.
„Ќе продолжиме да ги поддржуваме и да го стимулираме земјоделието. Се надевам дека следната сезона ќе имаме уште поголеми цени и така секоја година ќе одиме нагоре, затоа што мора трудот да се цени и мораме да стимулираме домашно производство“, додаде тој.
Св. Трифун традиционално се одбележува како заштитник на лозарите и винарите, а празникот се смета за симболичен почеток на новата лозарска сезона.
