Американската војска се подготвува за можноста од повеќенеделна воена операција против Иран, доколку претседателот Доналд Трамп даде наредба за напад, пренесува Ројтерс повикувајќи се на двајца американски функционери.
Според нив, станува збор за потенцијално значително поширок конфликт од досегашните тензии меѓу двете земји. Изворите, кои инсистирале на анонимност поради чувствителноста на информациите, посочуваат дека ваквите подготовки дополнително ја зголемуваат неизвесноста околу тековните дипломатски напори.
Минатата недела американски и ирански дипломати одржаа разговори во Оман, со цел да се оживее дијалогот за нуклеарната програма на Техеран. Сепак, паралелното зголемување на военото присуство на САД во регионот предизвикува стравувања од можна ескалација.
Американските власти информираат дека Пентагон веќе испраќа дополнителен носач на авиони на Блискиот Исток, како и илјадници војници, борбени авиони и уништувачи опремени со водени ракети, што значително ја зголемува огнената моќ на американските сили во регионот.
Во обраќање пред американските војници во база во Северна Каролина, Трамп изјави дека односите со Иран се „тежок договор“ и нагласи дека понекогаш е неопходен притисок за да се постигне решение.
„Понекогаш мора да се плашиш. Тоа е единственото нешто што навистина ќе ја реши ситуацијата“, изјави Трамп.
