Драматична акција за спасување се случи денеска во Аланија, Турција, каде куче беше извлечено од надојдените води на реката Димчај буквално во последните секунди пред да биде однесено од силната струја.
Според локални информации, две лица кои се наоѓале на покрив од објект покрај реката забележале дека животното се бори со водата. Со брза и ризична реакција тие успеале да го повлечат кучето на безбедно место непосредно пред надојдената река да го однесе.
Обилните врнежи во регионот ја зголемија водостојбата на браната Дим, која се приближила до својот максимален капацитет. Поради тоа биле извршени контролирани испусти на вода, што предизвикало нагло зголемување на нивото на реката и поплавување на излетнички зони и објекти покрај коритото.
Локалните власти издале предупредувања за евакуација на жителите од пониските делови покрај реката, додека спасувачките служби се на терен и ја следат состојбата.
Снимките од спасувањето брзо се проширија на социјалните мрежи и предизвикаа силни реакции, при што граѓаните ги пофалија храброста и брзата реакција на луѓето кои го спасија животното.
