Франција донесе нов енергетски закон со кој официјално се укинува претходната одлука за затворање на 14 нуклеарни реактори, што претставува значаен пресврт во енергетската политика на земјата.
Првичното затворање беше дел од изборното ветување на претседателот Емануел Макрон од 2017 година, но во меѓувреме француската влада го промени курсот и се насочи кон проширување на нуклеарниот сектор, со план за изградба на најмалку шест нови реактори.
Со новиот закон се намалуваат и националните цели за обновливи извори. Планираниот инсталиран капацитет на ветерни и соларни електрани до 2035 година е ревидиран на 105 до 135 гигавати, што е помалку од претходните предлози кои предвидуваа меѓу 133 и 163 гигавати.
Франција и понатаму останува една од земјите со најголемо учество на нуклеарната енергија во производството на електрична енергија, со околу две третини од струјата што доаѓа од нуклеарни централи.
Владата смета дека ваквата стратегија ќе обезбеди енергетска сигурност, стабилни цени на електричната енергија и намалени емисии на јаглерод, додека критичарите предупредуваат дека намалувањето на амбициите за обновливи извори може да го забави енергетскиот преод.
