Очевидец на тешката трамвајска несреќа во Сараево тврди дека возилото се движело без контрола, додека возачот мавтал со рацете и викал, обидувајќи се да предупреди дека нешто не е во ред. Според сведочењето, трамвајот влегол со голема брзина во раскрсница и излетал од шините.
Несреќата се случи во близина на Техничкото училиште, кога трамвајот удрил во постојка и покосил пешаци. Едно лице загина на местото, а четири лица беа повредени, од кои една 17-годишна девојка се здоби со најтешки повреди и ѝ беше ампутирана ногата.
Загинат млад студент
Жртвата е 23-годишниот Ердоан Моранкиќ, студент на Академијата за ликовни уметности во Сараево, кој починал на лице место.
Возачот уапсен, без алкохол во крвта
Полицијата го приведе возачот на трамвајот под сомнение за тешко дело против безбедноста во јавниот сообраќај. Според информациите, тој веднаш бил алкотестиран и не бил под дејство на алкохол.
Се испитуваат причините
Истрагата ја води Обвинителството на Кантонот Сараево и вклучува техничко вештачење на трамвајот, кој излетал при влегување во кривина. Снимките покажуваат дека возилото се движело со голема брзина, а како можни фактори се споменуваат техничка неисправност и старост на трамвајот.
Очевидецот тврди дека возачот се обидувал да сигнализира дека не може да го запре трамвајот, што отвора сомнеж дека станува збор за дефект, а не за човечка грешка.
