Градоначалникот на Општина Прилеп, Дејан Проданоски, денеска оствари протоколарна средба со амбасадорот на Република Словенија, Н.Е. Грегор Прескер.
На средбата се разговараше за продлабочување на досегашната успешна соработка и за иницијативата за обновување на протоколот за збратимување со словенечкиот град Копер. Посебен акцент беше ставен на образованието, со оглед на тоа дека голем број прилепски млади ја продолжуваат својата едукација во Словенија.
Проданоски и амбасадорот присуствуваа на обуката „Филигран и Рубин“ во СОУ „Орде Чопела“, која се реализираше во рамки на проектот „Вештини – клучот на зелената економија“. Обуката им овозможува на младите да стекнат конкретни вештини за традиционални занаети и да развиваат сопствени стартап бизниси, со особено внимание на природните богатства на Прилеп, како мермерот и македонскиот рубин.
Градоначалникот истакна дека ваквите иницијативи не само што инвестираат во знаењето на младите, туку и ја негуват културната традиција, која е клучна за идните генерации.
Проданоски упати благодарност до Амбасадата на Словенија, Министерството за надворешни и европски работи на Словенија и до сите партнери вклучени во проектот, нагласувајќи дека Прилеп има голем потенцијал кој заслужува континуирана поддршка.
…
