Од 1 јули 2026 година Европската Унија воведува нова фиксна царинска давачка од 3 евра за малите пратки со вредност под 150 евра што пристигнуваат од земји надвор од Унијата, најчесто преку онлајн продавници.
Со ова практично се укинува досегашното царинско ослободување за евтини нарачки, кое со години овозможуваше голем прилив на евтини производи од платформи како „Тему“, „Шеин“ и „АлиЕкспрес“.
Новата давачка нема да се пресметува по пакет, туку по категорија на производ во рамки на пратката. Тоа значи дека ако во еден пакет има производи од различни тарифни групи, царината ќе се наплатува повеќекратно – по 3 евра за секоја категорија.
Мерката е најавена како привремена и ќе важи од 1 јули 2026 до 1 јули 2028 година, кога се очекува да стапи во функција новиот европски систем за царинска обработка („Customs Data Hub“), по што ќе следи целосна реформа на царинската унија.
Според европските институции, целта е да се намали нелојалната конкуренција кон европските трговци, да се подобри контролата на безбедноста и квалитетот на производите и да се спречат злоупотреби во онлајн трговијата.
За македонските граѓани мерката ќе има индиректно влијание – таа ќе се применува кога пратките пристигнуваат на адреси во земји членки на ЕУ (на пример преку роднини, пријатели или магацини во Унијата), додека директните пратки во Македонија ќе зависат од домашните царински правила.
Експертите оценуваат дека новата царина најмногу ќе ги поскапи евтините онлајн нарачки, бидејќи дополнителните 3 евра претставуваат значителен трошок за производи што чинат само неколку евра.
