Поддршката од Вашингтон за Будимпешта денеска беше испратена без дипломатски ракавици. Од унгарската престолнина, Марко Рубио јасно порача дека администрацијата на Доналд Трамп гледа на лидерството на Виктор Орбан како на стратешки важен столб за американските национални интереси.
„Вашиот успех е и наш успех“, истакна Рубио на заедничката прес-конференција со Орбан во Будимпешта, нагласувајќи дека САД сакаат Унгарија да напредува – особено додека земјата ја води актуелниот премиер. Според него, билатералните односи влегуваат во „златна ера“, формулација што сугерира дека Вашингтон гледа на Орбан како на клучен партнер во регионот на Централна Европа.
Сепак, американскиот државен секретар внимателно подвлече дека конечниот збор за идниот политички курс на Унгарија ќе го имаат граѓаните на изборите закажани за 12 април. Тие избори се оценуваат како најсериозен тест за Орбан откако неговата партија Фидес ја презеде власта во 2010 година.
Посетата на Рубио на Унгарија е дел од неговата турнеја низ Централна Европа, која опфаќа и Словачка – земја чие раководство, како и унгарското, одржува блиски односи со Трамп и често зазема критички став кон политиките на Европската Унија.
Од своја страна, Орбан порача дека Будимпешта останува посветена на мировните иницијативи на САД во врска со војната во Украина. Тој информираше дека ја потврдил подготвеноста на Унгарија да ги поддржи напорите за мир и дека земјата е отворена за можноста да биде домаќин на евентуален мировен самит.
