Министерката за финансии, Гордана Димитриеска-Кочоска, денеска нагласи дека секој денар од државниот буџет мора да има јасна економска оправданост и да придонесува за развојот на земјата. Според неа, фискалната дисциплина и забрзаниот економски раст не се во спротивност, туку се меѓусебно условени.
На панел-дискусијата „Зајакнување на управувањето со државната помош во Западен Балкан: транспарентност, ефективност и усогласување со ЕУ“, Димитриеска-Кочоска појасни дека внимателното насочување на државните средства е клучно за создавање максимална додадена вредност. „Државната помош не смее да биде товар врз јавните финансии, туку инвестиција во конкурентноста и одржливиот раст“, рече таа.
Според официјалните податоци на Комисијата за заштита на конкуренцијата, во 2023 година државната помош достигнала 206 милиони евра, што е речиси 1,5% од БДП, додека во 2024 година пораснала на 235,2 милиони евра или 1,52% од БДП. Министерката нагласи дека овие бројки ја потврдуваат важноста на државната помош, но истовремено ја нагласуваат потребата од висока транспарентност и отчетност.
Економските показатели покажуваат позитивни ефекти од поддршката за инвестиции. Пет квартали по ред Македонија бележи раст од речиси и над три проценти, а во третиот квартал од 2025 година економскиот раст достигна 3,8%. Бруто-инвестициите пораснале за 30,6% во истиот период, главно како резултат на зголемената активност на приватниот сектор.
За да се поттикне економската активност и регионалниот развој, Владата обезбедила дополнителни средства: 250 милиони евра за поддршка на инвестициски проекти на компаниите и уште 250 милиони евра за капитални проекти во општините.
Панел-дискусијата беше организирана од Институтот за економски истражувања и политики Finance Think, а меѓу учесниците беа академици, претставници на бизнис-заедницата, институции од Западен Балкан, членови на комисиите за заштита на конкуренцијата, како и меѓународни соработници.
