Русија ја предупреди Европа дека ќе ја брани својата трговска флотa со секоја можна сила. Николај Патрушев, близок соработник на претседателот Владимир Путин, предупреди дека заплената на руски бродови од страна на западните земји може да доведе до одмазда кон европското бродарство.
„Ако не им се спротиставиме сега, Британците, Французите, па дури и балтичките држави ќе се однесуваат толку арогантно што ќе се обидат да ја блокираат нашата морска комуникација, особено во Атлантскиот регион“, изјави Патрушев за рускиот медиум „Аргументи и факти“.
Советникот на Путин посочи дека најсигурна гаранција за безбедно пловење е силната морнарица. Според него, Русија мора да одржува значајни поморски сили дури и во далечни региони, подготвени да ги „смират страстите на западните пирати“.
Оваа реторика следи по напорите на западните земји да ја ограничат Русија во глобалната трговија. До сега се воведени повеќе од 30.000 санкции поради војната во Украина, а американските власти веќе запленија танкер за нафта под руско знаме, што Кремљ го оцени како пиратство.
