Израел се подготвува за голема копнена операција во Либан, која би била најобемна од конфликтот во 2006 година и може дополнително да го прошири актуелниот судир на Блискиот Исток.
Според неименувани израелски претставници, владата на премиерот Бенјамин Нетанјаху првично се обидувала да ја ограничи ескалацијата на северната граница и фокусот да го насочи кон Иран. Сепак, ставот бил променет по координираниот напад на Хезболах и Иран на 11 март, кога кон израелска територија биле лансирани повеќе од 200 проектили.
„Пред овој напад бевме подготвени да разговараме за прекин на огнот во Либан, но по случувањата на 11 март повеќе нема враќање назад“, изјавил висок израелски функционер.
Од почетокот на војната со Иран, израелската армија на границата со Либан распореди три оклопни и пешадиски дивизии. Во изминатите две недели дел од копнените сили веќе изведуваа ограничени операции и напади во пограничните области.
Додека израелските сили се подготвуваат за поголема офанзива во јужен Либан, Иран во координација со Хезболах продолжува со напади врз цели во Израел, што ја зголемува опасноста од поширок регионален конфликт.
