Апсењето на поранешната министерка за образование, наука и култура на Црна Гора, Весна Братиќ, отвори ново поглавје во политичките турбуленции во земјата. Полицијата ја приведе под сомнение дека ја злоупотребила службената положба за време на нејзиниот мандат.
Братиќ беше дел од владата на Здравко Кривокапиќ во периодот од 2020 до 2023 година, првата влада формирана по падот на долгогодишното владеење на ДПС на Мило Ѓукановиќ. Нејзиниот мандат уште тогаш беше обележан со контроверзии.
Во фокусот на истрагата е одлуката од 2021 година, кога како министерка смени повеќе од 140 директори на основни и средни училишта низ Црна Гора. Образложението беше дека тие не формирале училишни одбори, но судовите подоцна утврдија дека разрешувањата биле незаконски. Последицата беше финансиска, државата исплати над 280 илјади евра обештетување на разрешените директори.
По распитот, на Братиќ ѝ е одреден 72-часовен притвор поради проценка дека постои ризик од влијание врз сведоци.
За време на нејзиниот мандат, таа беше перципирана како блиска до Српската православна црква, а нејзините јавни ставови често предизвикуваа остри реакции и длабоки поделби во црногорското општество.
