Министерката за финансии, Гордана Димитреска Кочоска, истакна дека борбата против неформалната економија е клучна за создавање праведно општество, стабилни јавни финансии и еднакви правила за сите.
Според неа, неформалната економија ја намалува конкурентноста, ги ограничува буџетските приходи и создава нелојална конкуренција кон чесните компании. Наместо репресија, целта на Министерството е формализација – создавање фер и транспарентни услови за работа, поедноставени процедури и поддршка за сите што сакаат да работат законски и одржливо.
Димитреска Кочоска нагласи дека преку дигитализација на процесите, воведување на системот е-фактура, унапредување на работата на УЈП, намалување на плаќањата во готово и усогласување на регулативата со европските стандарди, се поставуваат цврсти темели за модерна, транспарентна и конкурентна економија.
„Нашата цел е мерлива – намалување на неформалната економија и зајакнување на довербата во институциите“, истакна министерката, изразувајќи благодарност до институциите, бизнис-заедницата, синдикатите, граѓанските организации, академската заедница и меѓународните партнери, особено UNDP, за заедничката посветеност кон оваа долгорочна реформа.
Димитреска Кочоска потенцираше дека заедно се гради економија во која чесноста се вреднува, довербата се зајакнува, а можностите се еднакви за сите.
…
