Премиерот Христијан Мицкоски денеска потврди дека Владата ќе ја поддржува комуникацијата меѓу работодавачите и синдикатите, но нема намера да наметнува решенија околу барањето за минимална плата од 600 евра, пренесе МИА.
Во одговор на новинарско прашање, Мицкоски нагласи дека Владата ќе се држи до законските одредби при зголемувањето на минималната плата, истовремено охрабрувајќи бипартитен дијалог меѓу социјалните партнери. „Владата не е тука да одлучува наместо приватниот сектор, ниту да прифаќа или одбива барања во име на работодавачите“, рече тој, истакнувајќи дека во јавниот сектор веќе се постигнати договори со 98 до 99 проценти од вработените, кои важат до 2028 година.
Премиерот појасни дека иако не може директно да интервенира во односите помеѓу приватните компании и нивните вработени, Владата може да игра улога на посредник. Во таа насока, на почетокот на март е закажана седница на Економско-социјалниот совет, каде што ќе се работи на олеснување на дијалогот и приближување на ставовите за постигнување компромис.
„Искуствата од минатото покажаа дека наметнувањето решенија носи сериозни последици. Токму со тие грешки се соочуваме денес“, посочи Мицкоски, alудирајќи на политики на претходните влади.
По учеството на годишната конференција „Формализација на неформалната економија: Преку соработка до успех“, Мицкоски порача „Ние ги уредивме нашите односи и охрабруваме дијалог, тоа е нашиот одговорен и конзистентен пристап“. Тој додаде дека Владата останува отворена за соработка и со работниците и со работодавачите, со цел да помогне во изнаоѓање на одржливо решение.
