Воената разузнавачка и безбедносна служба на Шведска во својот годишен извештај остро предупреди дека Русија претставува „главна воена закана“ за Шведска и НАТО. Извештајот, објавен во вторник, ја потенцира сериозноста на заканата, оценувајќи го однесувањето на Москва како „опортунистичко и агресивно“.
Меѓу конкретните примери на руски активности се наведуваат нарушувања на воздушниот простор, саботажи и сајбер операции, особено во регионот на Балтичкото Море, каде што Шведска ја следи секоја поместување на руските сили.
Сличен тон имаше и минатонеделниот извештај на естонската Служба за надворешно разузнавање, која ја оцени Русија како „опасна и покрај нејзината некомпетентност“. Сепак, во извештајот се нагласува дека не постојат знаци дека Москва планира напад врз Естонија или НАТО во следната година. „Веројатноста за директна агресија во блиска иднина е мала“, се наведува, особено поради засилените одбранбени мерки на европските земји.
Висок функционер на НАТО минатата недела повтори сличен став, истакнувајќи ја важноста на колективната одбрана и довербата во членот 5 од Северноатлантскиот договор. „Она што нè штити е силата на алијансата и посветеноста на членките да ја зголемат својата одбрана на 3,5 проценти од БДП“, рече функционерот. „Додека продолжуваме да инвестираиме, тоа ја држи Русија оддалечена од било какви смели потези.“
И шведскиот и естонскиот извештај предупредуваат дека Русија ја продолжува својата милитаризација. Производството на артилерија и гранати се зголемило за неверојатни 17 пати од почетокот на инвазијата врз Украина, која влегува во својата петта година. Според естонските аналитичари, тоа е јасен сигнал дека Москва „се подготвува за својата следна војна“, без оглед на можностите за мир во регионот.
