Силна снежна бура проследена со дожд ја зафати Романија, оставајќи околу 200.000 домаќинства без електрична енергија и предизвикувајќи сериозни проблеми во сообраќајот низ земјата.
Според информациите, голем број автопати и државни патишта се блокирани, додека железничкиот сообраќај се одвива со значителни доцнења. Во повеќе региони, паднати дрвја ги отежнаа условите за движење, а службите интервенираат за расчистување на теренот.
Во главниот град Букурешт, снежната покривка достигна и до 40 сантиметри, што доведе до отежнато функционирање на јавниот превоз. Поради временските услови, наставата е прекината во повеќе градови, а дел од здравствените служби се соочуваат со проблеми – десет амбулантни возила останале заглавени во снегот во шест окрузи.
Надлежните информираат дека електричната енергија е повторно воспоставена за околу 86.000 домаќинства, но прекини и понатаму се евидентираат во стотици населени места.
Од институциите апелираат до граѓаните да избегнуваат непотребни патувања и да ги следат препораките на службите додека трае невремето.
