Македонската писателка, преведувачка и професорка Румена Бужаровска ќе биде меѓу учесниците на годинашниот Саем на книга во Лондон на панелот „Од рабовите на Европа до светот: Експанзијата на глобалната литература“. Настанот ќе се одржи на 11 март, во периодот од 16 до 17 часот, и ќе ги обедини тројцата автори чија работа ја потврдува актуелната трансформација на литературата од Југоисточна Европа.
Покрај Бужаровска, на панелот ќе учествуваат и Александар Хемон, босанско-американски писател и добитник на бројни меѓународни награди, како и хрватската авторка и поетеса Ивана Бодрожиќ, чии книги се преведени и прифатени од глобалната публика. Организаторите истакнуваат дека нивните перспективи ја одразуваат „виталноста и разновидноста на пишувањето од регионот денес“.
Саемот нагласува дека литературата од Југоисточна Европа сè повеќе привлекува меѓународно внимание. Преводите на делата се објавуваат од водечки издавачи, авторите освојуваат престижни награди, а растечката читателска публика открива нови приказни што некогаш биле сметани за „периферни“. Денес, регионот се позиционира како значаен и жив извор на литературни иновации.
Дискусијата ќе ја води Баз Пул, коосновач на Sandorf Passage и искусен издавач. Панелот ќе се фокусира на прашањата како локалните приказни успеваат да патуваат надвор од своите културни и јазични рамки, каква улога игра преводот како уметничко и културно посредување, и кои стратегии ѝ овозможуваат на литературата од мали или малцински јазици да стигне до меѓународните читатели.
