Македонско-словачкиот економски дијалог доби нов замав денеска во Скопје, каде што се одржува бизнис форум на кој се собраа стопанственици и инвеститори од двете земји. Министерот за надворешни работи и надворешна трговија, Тимчо Муцунски, оцени дека потенцијалот за економска соработка е значаен, особено во секторите на автомобилската индустрија и енергетиката.
„Ова е одлична можност за директни средби меѓу компаниите од Македонија и Словачка. Нашата цел не е само да привлекуваме инвестиции, туку и активно да го зголемиме извозот“, изјави Муцунски пред почетокот на форумот.
На настанот учествуваат претставници на голем број компании, што ја покажува сериозноста на намерите за продлабочување на деловното партнерство и размената на искуства меѓу двете економии. Форумот се очекува да отвори нови можности за конкретни бизнис договори и долгорочни инвестиции.
