Инспекторите во Општина Центар казнија четири градилишта, поради незаконско зафаќање на јавни површини со градежен шут и материјали кои претставуваат опасност за пешаците и за безбедното одвивање на сообраќајот.
Записници и прекршочни налози беа изготвени за објекти лоцирани на улиците Златко Шнајдер, 9 Мај, Дебарца и Васил Стефановски, а казните за овие прекршоци се движат од 1.300 до 1.800 евра.
Градоначалникот Горан Герасимовски истакна дека надзорот врз активните градилишта ќе продолжи со несмален интензитет. „Редовно ја следиме состојбата на сите градилишта во Општина Центар. Нулта толеранција има за секој кој го прекршува законот и ја загрозува јавната површина“, нагласи тој.
Според најавите од Општината, инспекциските контроли ќе останат континуирана мерка за обезбедување чист и функционален урбан простор, со цел да се заштитат пешаците и безбедноста на сообраќајот.
