Со убедливо мнозинство, пратениците на вчерашната седница го избраа Гоце Наумовски за нов уставен судија. Од 70 присутни гласачи, 63 се изјаснија „за“, седум гласаа „против“, а нема ниту еден „воздржан“. По изборот, Наумовски во Собранието положи свечена изјава дека својата функција ќе ја извршува совесно и одговорно, строго почитувајќи го Уставот и законите на државата.
Наумовски го пополнува местото што остана празно по оставката на професорката Јадранка Дабовиќ-Анастасовска во декември минатата година, која ја напушти функцијата поради здравствени и лични причини.
Дипломиран, магистриран и докториран на Правниот факултет „Јустинијан Први“ при Универзитетот „Свети Кирил и Методиј“ – Скопје, Наумовски го посвети својот академски живот на римското право, сметајќи го за темел на современите правни системи. Тој е редовен професор по римско право на истиот факултет и има богато искуство како правен експерт и советник во областа на законодавството. Во јавноста беше споменуван и како надворешен соработник на премиерот Христијан Мицкоски.
Покрај наставата, Наумовски активно учествувал на домашни и меѓународни научни конференции и бил ментор на бројни дипломски, магистерски и докторски трудови, градејќи солидна репутација како академик и правен експерт.
Иницијативата за негов избор дојде од претседателот на собраниската Комисија за прашања за изборите и именувањата, Ѓорѓија Сајкоски, кој нагласи дека Наумовски е кандидат со значително искуство и кредибилитет, способен да го штити Уставот и интересите на граѓаните. Предлогот беше утврден без расправа и со мнозинство гласови на Комисијата.
