Градоначалникот на Прилеп, Дејан Проданоски, ги презентираше резултатите од првите 100 дена од својот мандат, оценувајќи дека станува збор за период исполнет со интензивна работа, важни одлуки и конкретни проекти.
На настан посветен на овој период, Проданоски истакна дека транспарентноста и отчетноста биле клучни принципи во работењето на локалната самоуправа, нагласувајќи дека функцијата градоначалник ја гледа како обврска, одговорност, но и чест да му служи на градот.
„Сто дена можеби изгледаат кратко, но кога се исполнети со посветена работа, соочување со предизвици и поставување темели за идниот развој, нивното значење станува големо“, изјави Проданоски.
Тој посочи дека во изминатиот период биле донесени одлуки за стабилен финансиски развој и реализирани повеќе инфраструктурни проекти кои веќе го менуваат изгледот на градот. Меѓу нив се изградбата на кружен тек кај мостот Табана, реконструкцијата на тротоарот и поставувањето ново осветлување на улицата „Кеј 1 Мај“, како и обновата на спортските игралишта во населбата Точила.
Дополнително, во тек е реконструкција на дел од плоштадот „Методија Андонов-Ченто“, а реализирани се и еко-акции за чистење и уредување на јавните површини, вклучително и чистење на градската река. Градоначалникот истакна дека се вложува и во образованието, спортот, културата и социјалната заштита, со цел обезбедување одржлив и сеопфатен развој.
Проданоски упати благодарност до општинската администрација, јавните претпријатија и Владата за поддршката, истакнувајќи дека заедничката работа е клучна за постигнатите резултати.
„Сто дена се само почеток. Продолжуваме со иста енергија и посветеност, со фокус на младите, семејствата, инфраструктурата и чистата животна средина“, порача Проданоски.
…
