Се забележува растечки интерес кај тутунарите за новата реколта, откако заврши откупот на минатогодишниот тутун со речиси целосна реализација и просечна цена од 419 денари по килограм. Вкупно се откупени 26.072 тони, што претставува 99% од реколтата за 2025 година, што според Кире Ристески, претседател на Сојузот на земјоделски здруженија, ја прави реколтата успешна.
„Ова ни дава право да сметаме дека 2025 година беше успешна, особено што сега има зголемен интерес за нови договори“, изјави Ристески, додавајќи дека се очекува реколта од 28.000 до 29.000 тони за оваа година. Тутунарите, според него, се задоволни од цените, а благодарение на државните субвенции, кои достигнуваат до 100 денари по килограм преку комбинација на субвенции по килограм, по површина и за зелена нафта, нивниот приход е дополнително зголемен.
Во меѓувреме, Сојузот ги заврши преговорите со откупувачите за новата реколта. Предложени се цени од 510 денари за прва, 460 денари за втора и 400 денари за трета класа тутун. Откупувачите имаат рок до 20 февруари да се изјаснат, а доколку тоа не го сторат, се планира реколтата да се откупува исклучиво како прва класа. Склучувањето на новите договори започнува на 1 март.
Покрај тоа, на вчерашната средба во Министерството за земјоделство се дискутираше програмата за субвенционирање за оваа година. Сојузот уверува дека нема да има намалување на субвенциите, а беше договорено да се изготви календар за исплата на заостанатите средства. Исплатата ќе биде квартална, на секои четири месеци, што важи за сите земјоделци, од сточари и овоштари до оние со помали површини кои можат да се здружуваат за да ги користат субвенциите.
Ристески заклучува дека малите забелешки кои се појавиле не го менуваат основниот план: субвенциите остануваат стабилни, договорите со откупувачите ќе се финализираат, а тутунарите можат да очекуваат стабилни цени и поддршка и во новата реколта.
