Германската армија привремено ги повлече дел од своите војници од базата во Ербил, главниот град на автономниот регион Ирачки Курдистан, поради ескалирачките тензии на Блискиот Исток, објави „Араб њуз“.
Дел од персоналот бил преместен, додека на терен останува само неопходниот број за одржување на оперативната способност на кампот. Портпаролот на германското Министерство за одбрана не прецизираше што е точниот извор на тензиите, но потврди дека повлекувањето е координирано со мултинационалните партнери на Германија.
Германските војници во Ербил учествуваат во меѓународна мисија за обука на ирачките безбедносни сили. Растечката загриженост се поврзува со наредбата на американскиот претседател Доналд Трамп за засилување на военото присуство на САД во регионот и неговите закани за можни акции против Иран.
Претходно, полскиот премиер Доналд Туск ги повика своите граѓани да го напуштат Иран, предупредувајќи дека можноста за конфликт е „многу, многу реална“.
…
