Министерот за внатрешни работи, Панче Тошковски, предупреди дека возачите повеќе нема да можат да се правдаат дека влегле на зелено светло ако со тоа ја блокираат раскрсницата. Според новите правила, секој возач мора сам да процени дали има доволно простор за да ја помине крстосницата без да го отежни или запре сообраќајот.
„Ако возачот влезе во крстосница на зелено, но остане заглавен поради метеж, тоа ќе се смета за прекршок – не како минување на црвено светло, туку како забавување на сообраќајот во крстосница, со казна од околу 45 евра“, објасни Тошковски во гостување на ТВ21.
Тој појасни дека во тест-периодот камерите некогаш ги евидентирале возачите како да поминале на црвено, иако тие влегле на зелено, но останале блокирани во средината на раскрсницата. Со новите правила, ваквите ситуации ќе се третираат како „угушување“ на крстосницата, а не како прекршок за минување на црвено.
Клучната обврска останува на возачот – пред да тргне на зелено светло, мора да процени дали пред него има доволно простор за непречено поминување. Ако не постои простор, должен е да застане и да почека наместо да го блокира сообраќајот.
Покрај новите правила, министерот најави и воведување на паметен „зелен бран“ во Скопје. Станува збор за систем за координација на семафорите на булеварите со цел да се зголеми проточноста на возилата, при што се очекува движењето да се забрза за околу 30 проценти.
Системот ќе опфати сите главни булевари во градот, а надлежните нагласуваат дека анализите покажуваат дека традиционалните тајмери на семафорите често создаваат повеќе проблеми отколку корист.
Со новите мерки и технолошки решенија, вниманието е насочено на личната одговорност на возачите и на обезбедување непречен проток на сообраќајот, со цел да се спречат застои предизвикани од погрешна проценка при зелено светло.
