Прилеп мора да биде пример како искористувањето на минералните суровини може да значи реален локален развој, со јасни правила, одговорност и вистинско партнерство. Ова беше клучната порака од работната средба што градоначалникот на Прилеп, Дејан Проданоски, ја оствари со министерката за енергетика, рударство и минерални суровини, Сања Божиновска, заедно со претставници од министерството и државни советници за рударство.
На средбата се разговараше за актуелните состојби во енергетскиот и рударскиот сектор, како и за потребата од засилена координација меѓу централната и локалната власт. Посебен акцент беше ставен на улогата на концесионерите во прилепскиот регион и нивната обврска, покрај економската активност, да придонесуваат и за поширок општествен развој.
„Зголемените концесиски активности треба видливо да се одразуваат врз општината – преку нови работни места, економска динамика и приходи што се враќаат назад во заедницата. Економски напредок има само кога правилата важат еднакво за сите“, истакна Проданоски.
Во рамки на посетата беше одржана и средба со најистакнатите концесионери од регионот, на која се отворија прашања поврзани со законската регулатива, исполнувањето на преземените обврски и можностите за нови инвестиции. Заедничката оценка беше дека одржлив развој може да се постигне само преку транспарентност, јасно дефинирани правила и партнерски однос меѓу институциите и стопанството.
Како дел од договорените чекори, беше најавено отворање канцеларија на Државниот инспекторат во Прилеп, со цел поголемо присуство на терен, подобар надзор и зголемена транспарентност во секторот. „Контролата не е пречка за развојот, туку гаранција дека развојот е одржлив и фер“, нагласи градоначалникот.
Со оваа средба, локалната и централната власт испратија порака за координиран пристап кон јакнење на институционалната соработка, но и за јасна определба придобивките од неа директно да ги чувствуваат граѓаните на Прилеп.
…
