Новиот дипломатски импулс меѓу Скопје и Софија беше најавен утринава со телефонски разговор меѓу шефот на македонската дипломатија Тимчо Муцунски и неговата бугарска колешка Надежда Нејнски, која неодамна ја презеде функцијата министер за надворешни работи на Бугарија.
Во разговорот, Муцунски ѝ честиташе за новата должност, посакувајќи ѝ успешен мандат и динамична дипломатска агенда. Истовремено, тој ја потенцирал потребата билатералните односи да се развиваат врз јасни и стабилни темели, заемна доверба, добрососедство и отворен дијалог.
Од двете страни била изразена подготвеност за унапредување на комуникацијата и интензивирање на соработката во области од заемен интерес. Како конкретен чекор во таа насока, била договорена и идна средба меѓу двајцата министри, која треба да се реализира во периодот што следува.
