Патот меѓу Општина Кисела Вода и Општина Сопиште се затвори за сообраќај по итна одлука на локалните власти. Градоначалничката на Кисела Вода, Бети Стаменкоска Трајкоска, по заедничкиот теренски увид со градоначалникот на Сопиште, Јане Мицевски, и по детални стручни анализи во соработка со релевантните институции, информира дека моментално се прават напори за итно решавање на проблемот.
„Се работи на наоѓање на најбрзата и најбезбедната техничка опција за трајна санација на оштетувањето“, истакна Стаменкоска Трајкоска, додавајќи дека граѓаните треба строго да ја следат поставената сигнализација и да користат алтернативни рути додека патот не се врати во целосна функција.
Градоначалничката нагласи дека приоритет број еден е безбедноста на жителите и дека се вложуваат максимални напори за што побрзо враќање на сообраќајот на овој критичен патен правец.
