Оваа година, со доаѓањето на последниот викенд од март, часовниците повторно ќе се поместат на летно сметање на времето. На 29 март, во 2 часот наутро стрелките ќе се поместат еден час напред, што значи дека денот ќе трае само 23 часа, но вечерната светлина ќе се задржи подолго. Овој момент не е фиксен датум, туку секоја година се менува, бидејќи поместувањето секогаш се случува во последната недела од март. Затоа, понекогаш се случува тоа да биде порано, понекогаш подоцна во месецот.
Летното и зимското сметање на времето имаат за цел да се искористи дневната светлина и да се намали потрошувачката на енергија. Историјата на оваа пракса се враќа во Првата светска војна, кога Германија и Австро-Унгарија првпат го вовеле поместувањето на часовниците за да се штеди енергија. Во поранешна Југославија ова било применувано со прекини, додека конечно не било воспоставено во 1983 година. Стандарди на ниво на Европската Унија од 1996 година донеле хармонизација: сите земји-членки преминуваат на летно време во последната недела од март, а се враќаат на зимско време во последната недела од октомври, што ги олеснува транспортот, комуникациите и бизнисот низ унифицираниот европски пазар.
Главните аргументи за поместувањето на часовниците се добро познати: подолгите попладневни часови овозможуваат повеќе време надвор, што придонесува за поздрав начин на живот и зголемена продуктивност; намалувањето на потрошувачката на електрична енергија за осветлување и греење е дополнителна мотивација; а приспособувањето на сезонските промени на светлината помага луѓето полесно да ги усогласат дневните активности.
Сепак, не сите го поддржуваат ова. Незадоволството од менувањето на времето кулминираше во 2018 година, кога Европската комисија спроведе анкета со 4,6 милиони граѓани од ЕУ. Практично, огромното мнозинство го изрази мислењето дека постојаното поместување на часовниците станало пречка, а не благодет. Дебатите за укинување на сезонското поместување се интензивираат секоја година, особено во европските земји, каде јавните консултации укажуваат дека можеби е време за трајна одлука – дали да останеме на летно или на зимско време.
