Во својот говор пред Конгресот, кој траеше рекордни 1 час и 47 минути, американскиот претседател Доналд Трамп се обиде да го презентира неговото мандатно наследство како „златно доба“ за Соединетите Американски Држави. Од економијата до надворешната политика, Трамп го нагласи својот успех и постојано повторуваше дека „нашата земја победува како никогаш досега“.
„Граѓаните ме молат: премногу победуваме! Не можеме повеќе да го издржиме ова“, рече претседателот, додавајќи дека пред неговото доаѓање Америка само губела, а сега „победите се толку многу што веќе не знаеме што да правиме со нив“.
Првиот час од говорот Трамп го посвети на економијата, споредувајќи го своето наследство со периодот на претходниот претседател Џо Бајден. Според него, Бајден ја наследил земјата во криза – со стагнирана економија, висока инфлација и глобален хаос. Во контраст, Трамп истакна дека неговата администрација ја намалила инфлацијата, ги довела берзите на рекордни нивоа, вовела даночни олеснувања и ги намалила цените на лековите.
„Ова е трансформација каква што никој досега не видел. САД сега се почитувани во светот како никогаш досега“, порача Трамп, нагласувајќи дека милијарди долари инвестиции пристигнале од целиот свет, додека биле отворени илјадници нови фабрики и лаборатории, со 70.000 нови работни места само во градежната индустрија.
Трамп зборуваше и за надворешната политика, посебно за Венецуела и Иран. Тој истакна дека американското производство на нафта се зголемило за над 600.000 барели дневно и дека САД добиле над 80 милиони барели од „новиот пријател и партнер“ Венецуела. Според него, бројот на работни места во приватниот сектор достигнал историски максимум.
За Иран, Трамп повтори дека сите опции се на маса и дека Техеран не смее да развие нуклеарно оружје. Иако Техеран покажува интерес за дипломатски договор, тој рече дека сè уште нема конечен сигнал за откажување од нуклеарната програма. Американскиот претседател предупреди дека иранските ракети веќе претставуваат закана за Европа и американските бази, потенцирајќи дека се работи и на проектили кои би можеле да стигнат до САД.
Во салата се забележаа различни реакции. Републиканците често аплаудираа, додека демократите го исвиркаа говорот во неколку моменти. Трамп ги нарече „луди“ и ги обвини за изборна измама, тврдејќи дека би требало да има трет мандат, но дека се случуваат „чудни работи“.
Говорот беше воздржан по прашањето на царинските давачки, иако претседателот најави нивно враќање по друг пат, а за конфликтите во Русија и Украина, како и за Иран, понуди кратки коментари без конкретни планови, со акцент на дипломатијата.
Трамп повторно го потенцираше својот став за имиграцијата, тврдејќи дека недокументираните мигранти се причина за насилство, иако истражувањата не го потврдуваат тоа. Истовремено, тој не го спомена скандалот со Џефри Епстин, кој се очекуваше да биде дел од јавниот дискурс.
На крајот, Трамп уште еднаш ја повтори пораката што ја водеше цело време: Америка повторно победи и „сега победуваме толку многу што не знаеме што да правиме со тоа“.
