Дваесет и две години по трагичниот 26 февруари 2004 година, споменот на Борис Трајковски останува жив, како симбол на државничка посветеност и како болна страница од поновата македонска историја. Поранешниот претседател го загуби животот во авионска несреќа кај Ротимље, во близина на Мостар, заедно со членови на неговиот кабинет и екипажот на владиниот авион.
Годишнината од трагедијата денеска се одбележува на три локации што имаат силна симболика. Во Скопје, во неговата родна Струмица и на местото на несреќата во Босна и Херцеговина. Делегации од државниот врв, претставници на институции и членови на семејството ќе положат свежо цвеќе на неговиот гроб на Градските гробишта Бутел, како и пред спомен-обележјата во Ротимље и Струмица.
Кобното утро во 2004 година, владиниот авион „Кингер“, со кој претседателот патуваше на меѓународна конференција за инвестиции во Босна и Херцеговина, се урна во реонот на Матиќ Брдо, кај селото Хусковиќи, недалеку од Мостар. Леталото требало да слета на мостарскиот аеродром околу осум часот наутро, но наместо тоа исчезна од радарите. Остатоците беа лоцирани дури по едно деноноќие, во тешко пристапен и маглив терен.
Во несреќата, покрај Трајковски, загинаа и неговите соработници од кабинетот: Димка Илкова-Бошковиќ, Ристо Блажевски и Анита Кришан Лозановска, како и Миле Крстевски од Министерството за надворешни работи. Животот го загубија и членовите на обезбедувањето Борис Велинов и Аце Божиновски, како и пилотите Марко Марковски и Бранко Ивановски.
Спроведена од македонските и босанските надлежни органи, првичната истрага утврди дека до несреќата довеле пропусти во процедурата за приоѓање кон аеродромот во услови на сложена метеоролошка состојба, густа магла и намалена видливост. Години подоцна, во 2013 година, по барање на македонските власти беше отворена нова истрага, што ја водеше меѓународен тим предводен од Омер Кулиќ. И вториот извештај посочи комбинација од грешки на екипажот и системски слабости како клучни фактори за падот на авионот.
Роден на 25 јуни 1956 година во Струмица, Трајковски по образование беше дипломиран правник, со специјализација во деловно право и работни односи. Пред да стане шеф на државата, ја извршуваше функцијата заменик-министер за надворешни работи во владата предводена од Љубчо Георгиевски, а активно беше вклучен и во партиските и меѓународните политички процеси.
Во 1999 година беше избран за втор претседател на независна Македонија и ја извршуваше функцијата до неговата трагична смрт во 2004 година. Неговиот мандат остана запаметен по напорите за стабилизација на државата и зајакнување на меѓуетничкиот дијалог во чувствителен период.
