На социјалните мрежи во Кина се појавија лавини реакции откако шефот на кинеската компанија „Хенан Куангшан Крејн Ко., Лтд.“ направи нешто што ретко се гледа во деловниот свет: одлучи да подели огромен бонус од 26 милиони долари меѓу своите работници, со една необична, речиси филмска димензија.
Големата прослава се случи на 13 февруари, во сала преполна со вработени, околу 7.000 луѓе, за кои беа подготвени 800 маси натрупани со купишта банкноти. Во видеа што брзо кружат по интернет, се гледаат сцени што потсетуваат на телевизиски спектакли: маси натрупани со пари до работ, а работници кои со смеа и возбуда ги собираат банкнотите и ги носат во рацете или во пакети.
Според извештаите, вкупниот профит на компанијата, која работи во повеќе од 130 земји и осмислува и произведува кранови и сродни услуги, за 2025 година изнесувал околу 33 милиони евра. Од таа сума, неверојатни 70% биле доделени на вработените како бонус, потег што за многумина е сензационален во бизнис круговите.
Ова не е првпат компанијата да биде во центарот на внимание. Само месец претходно, во март 2025, „Хенан Куангшан Крејн“ додели бонуси од околу 195.000 евра на 2.000 свои женски вработени во чест на Меѓународниот ден на жената, што исто така привлече позитивни реакции.
Директорот на компанијата, кој сега веќе се стекна со прекарот „шефот кој најмногу сака да дели пари“, вели дека зад неговите одлуки не стои само желба за гести на великодушност. Тој објасни дека многу од неговите млади вработени се под притисок од лични финансиски обврски, кредити за автомобили, хипотеки и други трошоци што го отежнуваат животот.
Според него, секое олеснување што може да им го пружи е важен чекор кон подобро секојдневие.
ВИДЕОТО МОЖЕ ДА ГО ПОГЛЕДНЕТЕ ТУКА
