Оружените сили на Хрватска започнаа со нов систем за темелно воено оспособување на младите, кој се реализира преку осум недели интензивна обука. Целта е постепено да ги воведе учесниците во воениот свет, со акцент на стекнување на практични вештини и компетенции како пешадиски војник.
Началникот на Главниот штаб на Оружените сили, генерал-пуковник Тихомир Кундид, соопшти дека досега се испратени повеќе од 700 покани за учество, при што само седуммина млади се определиле за призив на совеста.
„Оружјето е подготвено, сите учесници ќе бидат опремени со нови јуришни пушки од хрватско производство VHS“, истакна Кундид, додавајќи дека стекнатите вештини на првата фаза ќе можат понатаму да се надградуваат преку резервен состав.
Тој нагласи дека двомесечната обука нема да им ги наруши животните планови на младите, туку ќе им обезбеди нови практични знаења и специфични вештини кои можат да им користат и во цивилниот живот.
„Нема за што да се плашат. Системот е димензиониран така што ги воведува чекор по чекор во воениот свет. Младите доаѓаат од цивилството и влегуваат ‘во жица’, но целосно можат да се интегрираат и да ги остварат целите што ги поставивме преку овие осум недели“, рече Кундид.
Кундид исто така додаде дека локациите за обука се подготвени, а инструкторите специјално обучени за работа со млади луѓе, што ја прави обуката различна од онаа со професионални војници.
Извор: Дневник.хр
