Дури 13,6 проценти од учениците на возраст од 13 до 15 години во Македонија користат некаков вид тутунски производ, покажуваат податоците од Глобалното истражување за употреба на тутун кај младите (GYTS). Ова е највисок досега евидентиран процент на млади пушачи во земјава.
Според анализата, никотинските производи сè повеќе се присутни меѓу учениците, а експертите предупредуваат дека раната изложеност создава зависност која подоцна тешко се надминува.
Загрижувачки е што дел од младите не користат само класични цигари, туку и други форми на никотин што се сметаат за „помодерни“, а често се промовираат преку дигитални канали.
Министерството за здравство најавува нов закон за заштита од пушење, кој треба да воведе европски стандарди и построги правила за употреба и промоција на тутунските и никотинските производи, особено во делот на заштита на младите. Законот предвидува ограничувања за рекламирање, како и мерки за намалување на изложеноста на тутунски чад во јавниот простор.
Податоците покажуваат и дека Македонија има една од највисоките стапки на пушење кај возрасните во Европа – над 45 проценти од популацијата користи тутун, што дополнително влијае врз навиките на младите.
Надлежните најавуваат дека во текот на 2026 година ќе се спроведуваат едукативни кампањи насочени кон учениците, со цел да се намали употребата на никотин и да се подигне свеста за здравствените ризици.
Здравствените работници предупредуваат дека никотинот во училиштата не е само здравствен, туку и општествен проблем, кој бара координирана акција на институциите, училиштата и родителите.
