Сè повеќе граѓани од Македонија патуваат во Косово и Србија за да купуваат поевтини лекови, покажува анализата на Радио Слободна Европа. Најчесто станува збор за терапии што лекарите ги препишуваат, но пациентите мора да ги купуваат приватно, што претставува сериозен финансиски товар.
Граничарите на преминот Блаце, како што пренесува РСЕ, често слушаат дека македонски државјани одат „до Елез Хан по лекови“, бидејќи тој град е на само неколку километри од границата и нуди значително пониски цени во аптеките.
Како пример
се наведува лекот „Ксарелто“, кој во Косово може да се купи и двојно поевтино отколку во Македонија. Институциите потврдуваат дека овој лек е меѓу приоритетите за ставање на позитивната листа во 2026 година, но конечната одлука ќе зависи од буџетските средства и одлуката на Управниот одбор на ФЗОМ.
Од Фондот за здравствено осигурување велат дека поддржуваат мерки за подобра достапност на лекови со пониски цени, додека Министерството за здравство посочува дека процесот за вклучување нови лекови на позитивната листа е во тек и се спроведува согласно пропишаните процедури.
Причината за ваквиот „фармацевтски туризам“ е високото учество на приватните плаќања во здравствениот систем. Според податоци на Светската здравствена организација, дури 40,4 проценти од вкупните здравствени трошоци во земјата се плаќаат од џеб, што е меѓу највисоките проценти во регионот и особено ги погодува посиромашните домаќинства.
Во моментов нема официјални податоци колку пари годишно се трошат надвор од државата за купување лекови, но пациентите велат дека здравјето „не може да има пазарна логика“ и дека се принудени да бараат поевтини алтернативи во соседството.
Надлежните најавуваат проширување на позитивната листа, особено со лекови за кардиоваскуларни заболувања, кои се водечка причина за смртност во Македонија, со цел да се намали финансискиот товар врз пациентите.
Целиот текст пфочитајте го на Радио слободна европа
