На 1 март се одбележува Денот на специјалната единица „Волци“, една од најелитните формации во рамките на македонската армија, која повеќе од три децении претставува симбол на храброст, професионализам и врвна подготвеност.
Единицата е формирана на 1 март 1994 година како Единица за специјални намени (6. одред), со што за првпат во Армијата на Република Македонија се создава специјализирана формација за изведување на сложени и високоризични операции. Со нејзиното формирање започнува процесот на професионализација на армијата и воведување на современи стандарди за специјални операции.
Во текот на годините, единицата поминува низ повеќе трансформации. Во 1998 година се воспоставува првата тимска формација и се врши преименување, додека во 2001 година „Волците“ стануваат дел од Единицата за борба против тероризам. Со формирањето на Командата за специјални единици, тие влегуваат во нејзиниот состав како одред, а во 2003 година се преструктуираат во баталјон за специјални намени.
Од самиот почеток, припадниците на единицата се избираат по строги критериуми, при што се бара висок степен на психофизичка подготвеност, дисциплина и издржливост. Селекцијата важи подеднакво и за старешините и за професионалните војници, со што се обезбедува врвен квалитет на кадарот.
„Волците“ зад себе имаат богато искуство од бројни обуки и вежби, како во земјата така и во странство. Меѓу позначајните активности се учествата на меѓународни воени вежби како „Јадрански орел“, „Македонски Блесок“ и „Спасител 98“, како и заедничките активности со вооружените сили на САД, Турција, Швајцарија, Албанија и Грција. Единицата развива способности преку алпинистички, падобрански, нуркачки и командо обуки, кои ја прават една од најподготвените во регионот.
Баталјонот за специјални намени активно учествува и во мировни мисии надвор од државата, со ангажман во Ирак, Авганистан, Либан и Босна и Херцеговина. За својата посветеност и професионализам, припадниците се добитници на бројни пофалници, медали и признанија.
Посебно значајно признание е доделено во 2005 година, кога со указ на тогашниот претседател Бранко Црвенковски, баталјонот е одликуван со Орден за воени заслуги – прв ваков орден доделен во државата, за исклучителна храброст и истакната служба.
Денес, „Волците“ остануваат препознатлив симбол на елитата во македонската армија, единица која ја гради својата репутација врз дисциплина, посветеност и непоколеблива служба кон татковината.
