Израелските воени операции против Иран ќе се интензивираат во наредните денови, изјави премиерот Бенјамин Нетанјаху по состанокот со министерот за одбрана Израел Кац, началникот на Генералштабот на Израелската одбранбена сила, генерал-потполковник Ејал Замир, и шефот на Мосад, Дејвид Барнеа.
„Нашите сили сега напаѓаат во срцето на Техеран со зголемен интензитет, а ова само ќе се зголемува“, рече Нетанјаху од покривот на седиштето на ИДФ во Тел Авив. Тој додаде дека деновите се болни, осврнувајќи се на смртоносните ирански напади во Тел Авив и Беит Шемеш, и упати сочувство и желби за брзо закрепнување до ранетите.
Девет лица загинаа во Беит Шемеш кога иранска балистичка ракета погодила станбена населба, соопшти амбулантната служба „Маген Дејвид Адом“. Според службите за итни случаи, зграда каде се криеле луѓе се срушила, а во тек е пребарување на лица за кои се стравува дека се под урнатините. Уништени се и околните возила, а на местото на ударот останал голем кратер и остатоци од бетон и метал.
Израелската војска посочи дека системот за рано предупредување функционирал како што е предвидено и дека околностите на нападот се во фаза на анализа.
